جاني وأنا في وسط ربعي وناسي..

جاني وأنا في وسط ربعي وناسي..
جاني نشلني مثل ما ينشل الناس..

مني نشل روح تشيل المآسي..
تشكي من أيام الشقى تشكي الياس..

اثر الألم في سكره الموت قاسي..
ما هالني مثله وأنا إنسان حساس..

جابوا كفن ابيض مقاسه مقاسي..
ولفوا به الجسم المحنط مع الرأس..

وشالوني أربع بالنعش ومتواسي..
عليه ومغطى على جسمي الباس..

وصلوا علي وكلهم في مآسي..
ربعي ومعهم ناس من كل الأجناس..

يا كيف سوا عقبنا تاج راسي..
وأمي ألحبيبه وش سوى بها الياس..

اسمع صدى صوت يهز الرواسي..
قولوا لها لا تلطم الخد يا ناس..

قولو لها حق وتجرعت كاسي..
لا تحترق كل يبي يجرع الكاس..

أصبحت في قبري و لابه مواسي..
واسمع قريع نعولهم يوم تنداس..

هيكل غريب وقال ليه التناسي..
صوته رهيب وخلفه اثنين حراس..

وقف وقال إن كنت يا نمر ناسي..
هاذي هي أعمالك تقدم بكراس..

ومن هول ما شفته وقف شعر راسي..
وانهارت أعصابي ولا أرد الأنفاس..

يا ليتني فكرت قبل انغماسي..
بالغفلة اللي منتهاها للإفلاس..

وفزيت من نومي على صوت ناسي..
واصرخ وأقول الموت واحذر الناس..